الشاعر .. صالح الشادي ..

( جامليني )


(1)

أدخليني ..
وإطفي الدنيا بحضورك واشعليني ..
....
كيف ؟؟
...
أدري إنك مافهتي شي ..
لكن .. جامليني .. !

أدخلي في أي عرق يخصني ..
واستعمري ذرات روحي ..
وعلميني الإنشطار .

قولي لتاريخ المراجل :
إستريح ..
وإفردي الأنثى على شط انبهار .

إقلبي وجه الحزن عني ..
خنقني ظله البارد
دخيلك.. إمنحيني لونهار .

ذلني هذا السمو اللي رفعني لوحدتي ..
مليت من عد النجوم البيض تحتي ..
لو سمحتي ..
ريحيني من جلاميد الشموخ بداخلي ..
وغازلي كبري بعطر الإنكسار .

إكسري هذا الجدار .

و أدخليني ..
وإطفي الدنيا بحضورك واشعليني ..
....
كيف ؟؟
...
أدري إنك مافهتي شي ..
لكن .. جامليني ..



(2)

كل شاعر يفترس أنثى خياله، في خياله ..
و مخلب الواقع يبدع في افتراسه لا صحى .

وكل شاعر ماسكن مثلك خياله ، شفت حاله
ماصحت شمسه ، على مركا التعاسة للضحى.

والليل ياليلى العصور الغابرة واليوم ..
لو غبتي يجيه النوم ..
ولو جيتي تخلى عن نعاسه ، واستحى .

يعني أحبك ..
منطقيني ، لاوجود لأي ميزان يساومني على الدوزان ..
جيتي .. دوزنيني ..
واعتلي كرسي الرئاسة ،
صالح الشادي انتحى .

الفرح هذا الخرافي البعيد ..
اشتقت له ..
قولي له إرحل من هناك ..
وزور هذا الناحل المطحون مابين السياسة والرحا .


الرحاب تضيق بي
والعمر يستفحل شجر وأغصان ..
والعصفور ماغرد ..
ودستور الوناسة .. إنمحى.

إمحي التعب عني فديتك ..
واكتبي هذا مكاني ..
وكل حي بها الزمن حر بحلاله ..
وكل شاعر يفترس أنثى خياله في خياله .

وادخليني ..
وإطفي الدنيا بحضورك واشعليني ..
....
كيف ؟؟
...
أدري إنك مافهتي شي ..
لكن .. جامليني .. !

( سلطان )


ولاتهتم ، مادامك صنيعة ربك الباري
إذا ربي خلق مخلوق ماينساه، (يا سلطان)!

(ياسلطان) أنا قبلك تعكّر نهري الجاري
وضاقت بي مساحات الوجود وضاقت الأركان

شقيت أكثر من اللازم غرقت بلجة أفكاري
رحلت ولا جنيت الا اغتراب ٍ، زادني حرمان

حسبت إني باغيّر دفة الأيام بإصراري !
وحسبت إن الزمن لوحة ،وأنا الألوان والفنان !

ونسيت إني بشر، يعني قدر،ما أملك أقداري
ونسيت إن الليالي ساجدات بمعبد الرحمن

(ياسلطان ) : ربك فوق يدري فيك ، ويداري
ولا ينسى ، ولا يقسى ،ولكن.. يصنعك إنسان!

عسى أن تكرهوا شيئا وفيه الخير..من داري؟
وعساك تحب شي ،وفيه ماتلقى سوى الخسران!

تِذكّر..وش حصل(لآدم أبوك)،وذنبه العاري!
وتِذكّر (نوح) وعقوق القريب،وفزعة الطوفان

وتذكر( يوسف الصديق)،ونجدة محمل ٍساري
وتذكروش حصل(لايوب)،وصبرأذهل الشيطان

وتذكر( يونس) وبحرالظلام ،وحوته الضاري
وتذكر سالفة (موسى) كليم الله ، والطغيان

وتذكر (صالح )المرسل مع اللي مالهم طاري
وتذكرطيب (عيسى)، واليهود، وقسوة الخذلان

على سنة (محمد )،وكّل الله دوم ياجاري
(ولن تشقى)،(ولن تبقى )على حالك كذا زعلان

وإذا تنسى ..تِذكّرني ، تراها تسّرك أخباري
طلبت الله .. ولاخيّب رجاي ، وزادني إيمان

وصارالكون من حولي بفضله يشبه غباري
صغير وتافه وهيّن ،ولو فكرت به غلطان.

تعدا الهم (يابو قيس ) وخذ شوري ومخباري
وسامح من جفاك ، ولا تهمك عثرة العميان

مساكين وغلابا ، هالخلايق بايع وشاري
وفيهم بايع نفسه ، وفيهم شاري الحقران

وفيهم من تعلاّ .. لين طاح وذرّه الذاري
وفيهم من سجن روحه ،بلا سجن ولا سجان

وفيهم من عرف ربه ، وربي بالخفا داري
وفيهم ناس مثلك يشبهون الشمس (ياسلطان )

(من غير ليه ! )

(1)

ليه شاعر.. ؟
وانت ، وش مزعلْك منّه ؟!

خلي هالانسان يعزف..
خله ينزف..
وينثر أوجاعه وفنّه.

وش عليك من احتراقه..
ومن مذاقه.؟!
ومن تناهيد الوجع واللي يكنّه ؟!

ليه يكسر.. ؟
ليه يسرف بالحداثة ؟
ليه مايوزن همومه.. ؟
وليه يكتب فوق سِنّه ؟

ليه ينثر.. ؟
ليه ماكمّل (حراثة ) ؟
ليه جددها (هدومه ).. ؟
وسن في (التعبير ) سُنّة ؟

يا أخي : من غير ليه ..!
إنت بس اكفيه شرّك..
وحِل عنّه ! .








(2)

ليه شاعر ؟
ماعجبْك إسكت ..
ترى غيرك يحِس وله مشاعر.

والبشر كومة مشاعر ..
من جنوب الأرض لأقصى ماخلق ربك مشاعر .

والقصيدة ..
زفرة احساس فريدة ..
تبتدي قبل الكلام ..
وتنتهي لكن .. دواير .

والقوافي
زخرفة موج ومرافي
والبحر انسان صافي ..
لا يهين ولا يعاير .

والضماير
كل هالدنيا ضماير
من شواهيد القبر لين المناير.

ومن كتب بالطرس ونّه
أو أمانيه اخذلنه..
ولا قِدر يرضي جنابك !
لاتخيب فيك ظنه..
وحِل عنّه.

(كثير)


قالوا كثير ..
واستفحل الموضوع بين العََود أبو لحية ..
وبين اللي بحجر أمه .. غرير .

وبين الشاعر (الطيب ) أبو الطيب (تبعنا ) ..
وبين أبو الطيب ( تبعهم ) .. وللأخير .

قلت : ياهذا السفر ..
وشفيك .. أشغلت البشر وابلشتهم ؟
يكفيهم اللي في (جماجمهم) من التفكير .

والله لا منفى، ولاغربة ، ولا تغيير.
الأمر في كل بساطة ..
رحت واحد ..
وجيت .. مع بعضي كثير .







(*)
فوق سفح من السفوح الهايمة بالشام ..
طاب للشاعر مقام .

وش يضر الشعر هذا (الاندحار ) إلى المعالي ..؟
والمعالي .. من مطاليب الكرام !

وش تبي هالناس مني ..
ليه أغني ،وليه أصحى ، وليه أنام !

الفتى هاجر وقلبه.. ماتعدى حارته ..
والراس ،
ماوجّه سوى لله والبيت الحرام .

وكل شي مكتوب ..
حتىإسألي ،المرزوق في هذا المدى ..
سرب الحمام .

والثرى كله ذلول .. (الله يقول )
والملا هذا ضعن .. وهذا تريّح في المقام ! .

لاتقولي : وش يصير ؟؟..
الأمر في كل بساطة ..
رحت واحد ..
وجيت مع بعضي .. كثير .


(*)
في الدفاتر دوريني ,,
ودوريني في الهوامش .

في بيوت من الورق .. موجود أنا ولازلت عايش .

مع شعاع الشمس أدخل كل صبح من الدرايش ..

وفي المسا ..
أرحل كما المعتاد .. واشق الغبايش .

فوضوي ..
يمكن أكون !
أو أكون العكس ماني فوضوي .
في براكيني سكون
وفي سكوني طفل (أزعر ) منزوي !

والقوي الله ..وفوق أقوى مخاليقه قوي .
له تطيح الهامه بليل وهجير ..
وفي ظلاله نستجير ..

والأمر في كل بساطة .
رحت واحد ..
وجيت مع بعضي .. كثير ! .

دعيني


دعيني دعيني أحرر ذاتي ..
من الوهم ..
من آهتي وأنيني ! .

دعيني فلست ليمناك ملكاً
ولست بعبد ، لكي تشتريني ! .

أنا سيدٌ ، قد خلقت لنفسي ..
لأملكها ، لا لكي تملكيني .
لم الحب ..
من شرّع الحب قولي ..
لم الصمت يا (إبرة البنسلين ) ؟



سأخرج من ذل قربك هذا ..
لأحيا البقايا بجوف عريني .
سأخرس أنشودة الشوق حتى يذوب الكرى ..
وحشة بعيوني .

سأغلق أبواب قلبي ..
وأنسى سخافات أمسي ..
فلا تذكريني

سئمت الغرام
وأهل الغرام
ومن يحتذي (سنّة) العاشقين ِ .




مللت من السعي خلف النحور
وخلف الصدور
وخلف ظنوني .

كرهت الرغاء
وعشق النساء
ونشوى اللقاء
فهيا أكرهيني .

يقولون قف لسمو المحب..
فتبا له ..
ولما يُسمعوني .








يقولون كن لحبيبك طوعاً ..
( لقد هزُلت يا ابنة الياسمين )
يقولون (قيس ) بليلاه جنّ ..
ألا رحم الله مني جنوني ! .

ليكتب شاعرنا في الهيام ..
كلاماً يؤرق نبض الوتين ِ .
ليصرخ آهٍ وآهٍ وآهٍ ..
لكَم في الدياجيّ هاجت شجوني !
ليصدح يا هاجرين تعالوا ..
أحباء روحي ألا ترحموني ….؟!


دعيه يعاني ..
ليخلق معنىً ..
ليغتال فيك الوفا لتخوني !
دعيه يدغدغ فيك الأنوثة ..
بالذوق، بالشوق حتى تليني .
دعيه يصارع موج اليمين وموج الشمال ..
إلى أن تهوني .
دعيه يزلزل صرخ شبابك مثل ( البقية ) ..
ثم دعيني .

(إنكسارات الظما )



يوه ( يا خالة) تعبت..
ولا لقيت اللي يبل الريق..
ريقي جف (يا خالة) ،
ولا كف الظما .

وينها ..
ماشفت أنا (ليلى ) لحد الآن..
يعني من عرفت (الما)
وأنا عطشان ياخالة ..
الى حد العمى .

تلقى ..
وأدورها ..
وتقولي : دوّر وتلقى ..
وأدوّرها ..
ولا غيمة ..
ولا وبلٍ همى .

ماكنها من باقة الحلوات ..
ياما مر من حلوات (ياخالة) –
ولكن ..
مالقيت اللي عليها القلب صبّح ..
أو تريّح و ارتمى .. ؟!

ما أدري قساوة طبع فيني ..
أو حنيني جاوز إدراكي وعيني ..
أوهي سنيني مشت ..
أو كيف ما ..
أو ربما ! .

الله أعلم ..
إنما .. تعبان (ياخالة) كثير ..
من إنكسارات الظما.







(2)

ليلي من أول ما عرفته..
ما تغير..
صمت ،
واحراق ،
وضباب .

ليل يوجعني عبوره ..
لا حضر
او لا تخنجر في عروقي
وصار ينزفني ..
ويسأل عن جواب !


ليل ينشدني -
عن اللي شعشعن في ضحوة أيامي..
وليه اقفن و راحن ..
وأنطفن في ناظري مثل السراب.. ؟!

وعن حبيبة
تو ما صارت حبيبة.. !
وليه ما صارت حبيبة ؟!
وليه غابت ها الحبيبة –
وأقفلت بيني وبين حضورها –
قبل الوعد مليون باب.

وعن سهر عيا يفارقني..
وعني .. !
وعن حقيقة هاا لسفر وسط القوافي -
وعن تفاصيل المنافي –
و الغياب.

ليل يسألني..
ولا يدري ..
وهذي عادته ..
دايم يحاصرني ب (لِمه ) ؟

الله أعلم ..
إنما .. تعبان (ياخالة) كثير ..
من إنكسارات الظما.








(3)

جيت وحدي ..
مثل ماتشوفين وحدي ..!
مامعي من شوشرة ذيك الدروب..
إلا قبيلة هم .. !

بالجفن شوفيها –
ولا فيها (بشوش ) إلا( الوجع )..
ذاك الوحيد اللي بوجهه دم.

إن صحت: (يا وجعي..)
طلعْ..
وإلا دَمَعْ في هجعة العاذل
وقال: أفبلت لك يا (عم ).. !


كبرت ( ياخاله) بهذا الحزن ..
والدنيا تصاغرها قصيدي..
وذا جديدي ..
شيبتين ،
وطفل مرعبْه الزمان ..
ولا يبي يُفطم .


والشعر ..
هذا حال من خاواه ..
كافر ..
لا يخلي رحمة الله تغسل الشاعر –
ولا يرحم !

والغاويات كثار
لكن ..
وينها ذيك العروس-
العيطموس ..
اللي على راحة يديها الجرح يتبلسم ؟!

يا فرح ماتم ..
ها الدنيا حكاية زايفة ..
وحنا بها..
جوعى وبقايا حلم .

البارحة راحت ..
ولا أدري وش تكون القابلة ..
ولا أدري عن علوم السهر فيها
وعن حال السما .


الله أعلم ..
إنما .. تعبان ياخالة كثير ..
من إنكسارات الظما.

كل ماذكر .. ماهو الا غيض من فيض لهذا الشاعر الكبير ..
فهناك الكثير الكثير .. من ابياته الرائعة ..

وسنختم مع قصيدته والتي كتبها عن نفسه ..
وتعبر عنه كثيراً ..

قصيدة مختلف جداً




دقايق صمت إن أمكن
أبـ أحكيلك عن المنجن
عن الغريد في دوحة طرب والفن
عن الإنسان والاحيان والممكن
أنا جيت لسواحل طرفك الساهي
مع ....أشباهي
من حدود الوطن من حدنا القاصي مع الأردن
أبـ أتعلم لغات العالم الرابع
أبـ أعرف سر ذاك (( المعجز السابع ))
أبـ أشرب كاسة الشاهي
وأبـ أقرا حسنك الباهي
أبـ أسمع وش يقول الموج بعيونك وأب أتمعن
يمكن
.
.

يمكن أتمدن
وأصير المختلف جدا
معي مسباح فضه من ثمنك أثمن
ألوح فيه قدامك
ومعي شاعر غريب وطيب المعدن
وثوب أطهر من أحلامك
ومعي ريح تشيل أهلي ونفح الشيح والسوسن
ومعي أيضا خيال أيسر وفكر أيمن
وبال بالهوى سالي
وقصيد يفضح هبالي
وقلب أميله يمك
مثل ماأميل عقالي
شمالي غير كل الناس
شمالي .. مختلف جدا
* * *
أنا يالمترفه من قبل أعرفك وأعرف الكهرب
ضويت الليل بإحساسي وشفت الذيب والعقرب
وزرعت بمهمهات الغيد نوري وقلت لا تغرب
وعلمت الوفا وشلون لا ينسى ولا يكذب
وخاويت الطموح وقلت لا ملجا ولا مهرب
وعانقت النجوم أيام
وعاشرت السهر وأنجب
تعلمت بسنين الصبر
كيف أشرب صميل الحبر
كيف أجمع وكيف أطرح وكيف أقسم وكيف أضرب
وقلت لخاطري غني فلا غيرك لي المطرب
وقلت لناقلات الغيم وَلِّن بالنكد ولن
وقلت لكل عين وعين حرام الدمع لا تبكن
عرفتي ليه ؟
لأني بايع الدنيا
ولأني شاري الدنيا
ولأنك عكس هالدنيا
ولأني ...مختلف جدا
* * *
على تغريدة الساعه وصوت التبغ والجمره
أعسعس في عتامي لين أنفس صبحي بفكره
أشب الريح بشراع القلم الأزرق
أجدف لين يغمرني الورق وأغرق
أسافر من سخافاتي
إلى ذاتي
إلى آخر مسافاتي
وأظل الشاعر الأصدق
أظل الخاين اللي خان زيف الحب والعشره
أظل الكاين اللي كان في رحم الزمن قطره
على الفطره
على الفطره
أخوض بغابة الدخان
أهز أغصانه العذرى
أخلي للعدم عنوان
أروض للوهم مهره
وأعزم الفارس أختبره
ولا طالت مساييري
وناخت بي تعابيري
وبددني شقا التفكير
قلت أزين
لأني للشقا مدمن
وجدا مختلف جدا
* * *
علامات التعجب ليه على وجهك بدت تكثر
كأنك تسأليني عن سماري وليه أنا أسمر
وليه إن الشجر أخضر وزهره أحمر وأصفر
وليه إن البلابل في المسا ترتاح ماتسهر
وليه إن الطفل يكبر
ليه الأرض تتفجر
ليه الصدق صار أعنف من الزلزال
أو أخطر
وليه أحب أنا العالي
وليه أموت بالمرمر
بديهيات بديهيات بديهيات
لا أكثر
* * *
أنا هذا أنا
مثل الحزن وسط العزا
عادي
مثل الزغاريد البهيجه بالفرح
عادي
مثل النفاق اللي سكن كل البشر
عادي
مثل المطر
مثل ابتهالات الخزامى والزهر
عادي
مرن ثلاثين علي وكن مامرن
هذا أنا صالح
هذا أنا الشادي
ولكن ..
مختلف جدا

اتمنى .. ان ينال هذا الموضوع على رضاكم ..
وان ترقى هذه الابيات الى ذائقتكم ..
وان لم يكن فمنكم المعذرة ..


ودي ..

بارك.الله.فيك.اخي الفيصل وجزاك. الله.عنا .كل .الخير
مشكور .على .اعمالك.الجيدة .والمفيدة
بارك . الله. فيك ... وأحسن إليك ... ونفع بك
وزادكم. علم.ومعرفة

ابو زياد .. الف شكر على هذه الاطلالة ..
وهذه الكلمات التشجيعية المميزة ..
وبإذن الله القادم افضل ..

ودي ..