رد: الشاعر .. صالح الشادي ..
(زوبعة )
زوبعة..
تقفي بغضب..!
لا ثار جمر الدم فيها،
وجابها لي ، أنطفيها -
واطفي اللي ما انطفآ فيها..
وأفل الأشرعة ! .
وأبحِر..
وأدورها وتمُوج..
وترتفع، وأرقى، وتهُوج..
وإن ضوا وجه البروج -
بكل قوّة.. تمنعه !
ما بين سوْفَ، ولا، ولنْ.. !
أكيدها: يمكن، وأظُن.
و إذا غفت..
ما تمنح المرقد وسن..
ولا تمنح البرد الدفا ؟!
وتصحى..
تهز الراس مرة /مرتين..
وتعض ورد الفم
وتْردد على استحيا.. أفا !
وتروح وجلا مسرعة
وتندم
وتقلب زوبعة ! .
(2)
تغيب..
وإن غاب الندم.. ترجع !
ولا أَحلى..
ولا أَجمل..
ولا أَروع.
وأداهمها بعذر العاشق المعتاد.
وأقول: إن الحلا صياد..
وأنا وشلون إذا جن الدلع..
أكون بالمرصاد-
ولا أخضع ؟!
وأنا وشلون أغطي في حضورك وجه قلبي..
والغلا ما يحجبه برقع.. ولا ملفع؟!
ولو تدرين..
أنا وشلون تفدع بي ذياب الشوق..!
وترثع بي حكاوي معركة حطين..
ليا صرتي بحضن الموق،
ورمشك، يسجد ويركع..!؟
وأداهمها وتداهمني
وتقول: إحلم .. !
وتنَقّى من كراسي الروح -
في عرش المسا ما طاب..
واتْربع.
وقبل أصحى، تقول: إطلع
وينهال الجفا -
وتصحى..
تهز الراس مرة /مرتين..
وتعض ورد الفم
وتْردد على استحيا.. أفا !
وتروح وجلا مسرعة
وتندم
وتقلب زوبعة ! .
(3)
مثِل حرف القصيد أطوار..
تجي مرّة تجيب أمطار..
وتجي مرّة وتشعل نار..
وتجي مرّة تريد الثار مني-
والفلك دوّار.. !
على هونِك..
فديت الحيرة اللي مالقت في عاصمة حسنك..
سكن أو دار.
على هونِك تعالي من تواليها..
وفليها..
وخلي الكبريا..
مالي وما للكبرياءْ،
ودوشة التبرير، والأعذار.
على هونِك تعالي / تكمل الأضلاع..
يعني: من تَخَلى ضاع..
يعني: لميّ الأوجاع وداويني -
وردي بعضي اللي طار.
على هونِك.
وتمنعني..
وتقول إنتَ / على هونَك..!
أنا حنيت لعيونك..؟!
وجيتك قصدي زيارة..
ومثلك.. يكرم الزوار.
وقبل آصب فنجال الهلا.. تقفي
وينحاس الصفا..!
وتصحى..
تهز الراس مرة /مرتين..
وتعض ورد الفم
وتردد على استحيا.. أفا !
وتروح وجلا مسرعة
وتندم
وتقلب زوبعة ! .
|